kîspin awiyak kinitawîmâw ka-pîkiskwâtat, the hope of wellness kâ-kî-sîwêpitamowêwak iyiniwak. atoskêwak êkota ayâwak ka-pîkiskwêcik âpô mîna kâkî-masinahatâmowâwak. môniyawêwak êkwa mîna mistikôsîmowak, êkwa, kîspin nanitotamâkêyani, nêhiyawêwak, nâhkwêwak, êkwa Inuktitut mîna. sîwêpicikê 1-855-242-3310 awiyak kâkî-pîkiskwâtaw âpô anita www.hopeforwellness.ca. ôma mîna national residential residential school crisis line kâkî-sîwêpicikân êkwa aniki ayisiyiniwak kâkî-kiskinwahamâkosicik êkwa owâhkôhmâkaniwâwa kâkî-pîkiskwâtawak. sîwêpicikê mâkwêyimowiyini 1-866-925-4419. tâpitaw otênikâtêw ôma 24 tipahikan, mîna têpakohp kîsikâwa.

awa kihci-okimâw, justin trudeau, anohc ôma wihtam ohci tâpwêwin êkwa mîna miyo-wihcihitowin:

“anohc, ôma ka-mâmawi-kiskisiyahk tâpwêwin êkwa mîna miyo-wihcihitowin (National Day for Truth and Reconciliation), pêyakwan mîna kâ-isi-nisitohtamahk kâ-osâwi-pakwawiyân kîsikâk (Orange Shirt Day), kiwâpahtênânâw kâkî-mâyi-paminêht iyiniw, inôwit, êkwa âpihtawikosisân ôta kânata. kimâmawi-payinânaw ka-kiskisiyahk awâsis kâkî-kimotamâcik, êkwa aniki kâkî-pihtikwêpinêcik ôhi âkîhtâp kiskinwahamâtowikamikwa. kikistêyihimânawak anohc kâkî-pimohtêcik, kâkî-kitimahêcik pokwêsi-isi. kipihtawânawak ôki ka-âcimisocik, êkwa kihtwam ka-kiskisinânâw poko ka-mâmawi-atoskâtamahk kwayas ka-isinâkwahk ôta ôma kânata.

“ispihk 1867 isko 1998, ayiwâk 150,000 iyiniwak, inôwit, êkwa âpihtawikosisânak ê-kî-sipwêtahêcik êkwa ê-kî-kiskinwahamâkêhîcik ohpimihk, êkota môy ohci pakitinâwak ka-nêhiyawêcik êkwa mîna môya ka-nêhiyawi-tâpwakêhtâhkik. kîyâpic mîcêt papâmi-nanitonikêwak ocawâsimisiwâwa, onîkânêwak ohci kânata nohtê-sihtoskâkêwak ôki kâ-kwâtakiyihtâkik, nâmôya kâ-ohci-pê-kîwêyit ocawâsimisiwâwa, êkwa mîna kitawâniwâwa namôya ka-waniskisi mistahi kiyâpic ka-atoskâtamihk.

“namôya wîkâc ka-waniskisiyahk ôma kâkî-pê-ispayêk êkwa ôki iyiniwak kâkî-pê-isi-paminihêcik anihi kiskinwahamâtowikamikwa, mîna anima kâ-isi-ohpikinawâwasohk anohc. mêkwâc ôma, kâ-ahâniwihtamihk, poko kwayas ka-ahkam-nanitonikêhk êkwa ayiwâk. êyako ohci ôma awiyak êkwa ôma kwayas ka-nâkatohkêt ôhi awâsisak ôki kâ-mêkwa-nanitonâcik êkwa anihi yikwahaskâna, awa Kimberly murray, ka-wîcihtâw ôma nanitonikêwin ka-sihtoskawât iyiniwa, inôwit ôki, êkwa âpihtawikosisânak kwayas-isi ka-mâmawi-atoskahtâkik.

“anohc, nipakosiyimitinânâwâw kahkiyaw ka-postiskamêk ohi osaw-pakwayâna ka-mâmawi-kiskisiyahk kahkiyaw awâsis, mîna sihtoskâkêk kâ-mâmawipayêk êkwa môya ka-waniskisihk ôma kâkî-ispayêk. môya ka-pêyakôkamâtocik ôki iyiniwak – kahkiyaw ôma ka-mâmawi-atoskamâtoyahk. ka-mâmawi-nanitohtamahk poko, ka-mâmawi-kiskinwahamâkawiyahk, êkwa ka-miyâyâhkik ôki iyiniwak, inôwit êkwa apihtawikosisânak ka-pîkiskwêcik êkwa ka-âcimocik, êkwa ka-nanitohtamahk tâpwêwin, ka-mâmawi-nayâhtamahk, êkwa ôtê nîkân ka-mâmitonîyihtamahk kânata ohci.”