Ishpin awik wi kinonitc, oma animitagozin, Hope for Wellness, kina anishnabe eh inegizitc odja. Kida teyok keh wido kak mideshidjigini kak koni kozabijigini kak Agineshamok mamowi amtcigojimok keh kishka wido kak, ndendimin, cree ijigijewin, mamowi Ojibway acitc Inuktitut. Oma animitagozin, kan kiga ndoshkagosin, 1-855-242-3310 koni wendik kozabidjigani ka abidjitowatc, www.hopeforwellness.ca. mamowi mehkodehkoneh kinamage-migwamik acitc kida kishka kinonak, kagi pi kinamagoziyatc odja. Oma acitc kan kiga ndoshkagosin 1-866-925-4419. 24/7 minigik the awik ishpin wi kinonitc awik animendimowin, etsa kijigik.

Ogimanodagin Justin Trudeau, nogom ogi pigidinan odikidowin mizinigini kak yedi odja tebwendjigeh mamowi ijitcigewini kijiginik odja:

“Nogom kida mizinadeh acitc kida kendagon wedi apitc ijigijigik, Tebwetimowin ijitcigewin kijigik odja Orange Shirt Day misko-ozawa bigan kijigik acitc ijinkadjigadeh. Niga gweshtonanan kidja widokowak kidja naganik odja kagi-pi nehkadjiyaginiwatc kagi pinda kinamagoziyatc wendi anishnabek, kagi nekadjiyaginiwatc, kakina eh inowegiziyatc. Kida kishka widjigabwitadiman kidja mamdinenmayik gwendik abinodjishik kagi pi kimodinanok anishnabeh kak, kagi mikimaginiyatc anishnabek obamadiziwiniya mehkodehkoneh kinamageh-migwamik kagi kinendagoziyatc. Ni mokowenmanan maneh kagi-pi shwabwiyatc weni, maneh kagi pi mosadik wisigendimowini, adidik gotc ka-pi ijiwebiziyatc. Niditwanan adi eh-ija tebwemiganik, mihi yedi ka odapinimak kidja kishka ikidowak keh ijitcigeyak kidja minobidek kina eh inowegizitc anishnabek odja oma Canada.

“Apitc megwatc 1867 mamowi 1998, oshmesh 150,000 anishnabek, tokolok acitc aptwizik abinojishik kipi madjiyonaginiyok ka ija-pi wakanibiyatc, ki=pi kadjiyaginiyok kidja kinamowaginiyatc, agwa kidja anishnabemowatc koni kidja ijitcigetc adi ka ija pi madizitc. Nogom manehyok kiyabitc ka nidowadjin odibinojishimiyawan, agw wikat kagi pigiwendjian, Canada ogimanodagin nogom kida asidizo ima kidja nanagidjitok acitc kidja atok ima kina kegoni keh widokagotc weni kidja shwabwikidik kakina anishnabe eh inowegizitc. Kidja kendimowatc kakina adi kapi ijiwebiziyatc, kidja anomkodadwik odja kagi kishka oditimowatc tibi ka-pi odiseyatc, mamowi kakina kidja widjigabwitowayik nogom kakina anishnabe eh inehgizitc ka ija wankanibiyatc odi nigan.

“Kan panima wikat kiga onikehsiman adi kapi ijiwebiziyatc kaina anishnabek, ka ija-pi nehkadjiyaginiyatc, mamowi gotc nogom kiyabitc ka wisigendimowatc weni odja. Nogom dish acitc, kiyabitc atcigotc kama mishkwizimigak anowehtimowin, kinoweh notc kida shwabwimigan tebwetimowin. Mihi nogom ehgi odja pidikshimak keh widokagwadin anishnabek, kagi oniyawadin koni agwa wikat kagi pigiwendjin odibinojishmiyawan, mamowi kagi pi-nigowagowadjin agwa kagi kendagozindjin kapi odisendjin koni agonen odabinodjishman, kawidokazitc yeni odja kagi-pi ijandjan wedi mehkodehkoneh kinamageh-migwamik, Kimberly Murray ijinkazo, mihi awedi kagi asaginitc kidja niganikidik weni kidja ijiyebinik kidja widokowadjin kakina anishnabe eh inegizindjin.

“Nogom wedi keh kijigik, na poksenimanan kakina awik kidja piskik weni ka misko ozawanik abigiyani, ka ikidomigaik kakina abinojish madiziwini kotendagoni kewinwa, mamowi dish pinigotc wedi kidja pinda kendagok ka-pi ijiwebiziyatc anishnabek. Kano-weni odidowinya anishnabek,- kakina owedi kinwet kididwinnan. Kinwet panima aji kiga nditananan, kiga kinamagomin aji, acitc panima kiga minanan weni koki anishnabe adi eh ija ndendik, kakina gotc anishnabe eh-inowegizitc, panima kiga kendananan kagi ijiyebik odi ishkwiyak anishnabek odja, mkidja kishka mamowi mino tijikemdik nogom mamowi odi wasik nigan kina pemadizijik odja.”