Keeshpin ki-nouhtay peekishkwawtaw awiyek, Ooma Pakoushaymoowin poor Miywayawin Weechihwaywin Shaywaypichikun miyoumaykiw weechihiwaywin ishi kahkiyuw Indigene Li moond. Kakayeshkimaywwuk ihtakouwak ishi li foon keema daw li computer pawhpeekishkwaywin. Ooma pamihiwaywin ihtakwun ishi L’Awnglay pi L’Kenayaen, akwa, ishpee kaw-natawayistakwahk, ishi awn Cree, Ojibway, pi aen Niskimoo. Taypwayhkun outa mouschi shaywepichikun Weechihwaywin Shaywaypichikun itay 1-855-242-3310 keema chi-kakway akimishouyin keema daw li computer pawhpeekishkwaywin itay www.hopeforwellness.ca. Ooma Mishiway itay Alawntour Itaykawweekihk L’ikol Mayipayiwin Shaywaypichikun meena miyoumaykiw peekwayihtamoowin weechihiwaywin pi mayipayiwin kakayshkimiwaywin weechihwaywina poor itaykawweekihk l’ikol Opashpeewak pi see famee. Taypwayhkun ooma mouschi shaywepichikun Mayipayiwin Shaywaypichikun itay 1-866-925-4419. Ooma weechihwaywin ihtakwun kawhkapaya, set d’zhournee payyek aen smenn.

Awa Kischi li Ministr, Justin Trudeau, anoush keepatinam ooma weestamakaywin ouschi Mishiway itay En zhournee d’ La Vayritee pi Weechiwawhkoostouwin:

“Anoush, kaw-kishkishayahk Ooma Mishiway itay Alawntour En zhournee d’ La Vayritee pi Weechiwawhkoostouwin, kishkayistawun meena ishi Aen Narawnzh La Shmeezh D’zhournee, ki-muwnayshkaynaw kinwaensheesh ayimihiwewina ouschi itaykawweekihk l’ikol aen system poor Li Promyee Nawsyoon, Aen Niskimoo, pi aen Michif didawn Kenadaw. Kaw-mamawitouyahk chi-kishkishihk lee zawnfawn kaw-kee-kimoutihk ouschi see alwantour, pi aykwawniki see sa vee kee-kimoutiwawn ouschi aykwawnihi kaw-ishinhkawtayihk l’ikol. Ni-kischeetayminanik ooki Opashpeewak, mischayt kaw-kee-kakwawtakistachik shakoochihikoochihiwawyin, peekwayihtamoowin, pi ahkwatishiwin. Ni-natouhtaynawn see tawpwaywina, akwa kawhkeestwawmitwaynawn niashoutamakaywinawn chi-oustahk nawut miyeu li tawn ki vyayn poor Indigene Li moond pi poor kahkiyuw awiyek didawn Kenadaw.

“Awnter 1867 pi 1998, pawschi 150,000 Li Promyee Nawsyoon, Aen Niskimoo, pi Aen Michif lee zawnfawn kee-outinawak ouschi see famee pi see alawntour akwa il a forsee chi-itouhtaychik itaykawweekihk l’ikol, itay kee-nakinawuk chi-peekishkwaychik see la lawngaezh pi chi-awpachistawt onakaayashkumowina pi anishkootootamowina. Ishi lee alawntour kaw-ahkamay natounawawchik lee zawnfawn aka kaw-kee-ouschi keeweechik, ooki Li Gouvarnimaw di Kenadawwill akouta chi-ahkamay ayowak shipamihiwayt avek awpachischikana kaw-ayndawayishchikawtayk mitouni chi-wawpaschikawtayk tawpwaywin ouschi kaykwuy kaw-kee-ispayik itaykawweekihk l’ikol, chi-kischaymohk lee zawnfawn aka kaw-kee-ouschi keeweechik, pi weechihiwaywin ishi lee alwantour kaw-ahkamayihtahkik sa miywayawin pimachihouwin.

“Pikou eka chi-wanikishkishihk la pawsee pi mayitouchikaywin kaw-kee-itouchikawtaykihk pakwatem Indigene Li moond itaykawweekihk l’ikols, akwa meena awn partawn li moud kakwawtakistawin aykwawnima keeyapit kaw-noukwan anoush. Anoush ooma maykwawt, avek noo aytawpwaywakayistamoowin mitouni kaw-ouhpipayin, meeshkoupitamoowin kahkiyuw tawpwaywin si aykwawnima ayiwawk akwa aenportaan. Akouschee ninawashounawnawn awa Wiya-ikou ashpayimouwin Kischee Opeekishwayistamakayw poor Namataywuk Lee zawnfawn pi namoo Mashinaykawtaywa lee Fous pi Nahinikaywina ouschipayiwin avek Li promyeen Itaykawweekihk l’ikol, Kimberly Murray, chi-weechihiwayhk kaw-mawchistahk natounikaywin paminikaywin avek Li Promyee Nawsyoon, Aen Niskimoo, Aen Michif aykwawnima chi-rispay sa endawaychikaywina pi nakatoohkaywina ishpee kaw-atoushkawtamahk mamawi chi-wawpaschikawtayk akwa shimanawchistawhk tawpwaywin ouschi kahkwuy kaw-kee-ishpayik itaykawweekihk l’ikol.

“Anoush, ki-sheehkimitinawow chi-poustiskamik aen narawnzh nishtawinumakaywin aykwawnima kahkyuw lee zawnfawn kishchayimawak akwa chi-takooyin daw Indigene-oneekwaneewin kaw-mow-ashouhoutouk chi-nishtawinumahk pi nanawkatawayistamahk ooma ahkamay nakatamakaywin ouschi itaykawweekihk l’ikol aen system. Weechi wawhkoostouwin si aykwawnima namoo pishkayimiwawn ouschi Indigene Li moond – aykwawnima pishkayimiwawn ouschi kahiyuw kiyanawn. Kiyanawn ooma pishkayimiwawn chi-natouhtamahk ishi, kishkayistamahk ouschi, pi mekihk lispass ishi Li Promyee Nawsyoon, Aen Niskimoo, pi Aen Michif peekishkwaywina pi lee zistwayr, pi chi-outishkawayshkamahk tawpwaywin ouschi li pawsee chi-oushtahk nawachiko kwayesh toutamouwin, ayiwawk nahiyikouhk, pi ayiwawk kaw-takwashtawhk Kenadaw poor aykwawniki awn partawn li moud kaw-peetouhtaychik.”