“ᐱᒋᐊᒃᑲᓐᓂᕈᒪᓂᖅ ᑭᖑᕚᒌᖕᓄᑦ ᐱᓕᕆᐊᕆᔭᐅᔪᖅ, ᐊᑐᖅᑕᐅᕙᒃᖢᓂ ᖃᐅᑕᒫᓐ. ᐅᕙᓂ ᑲᓇᑕᒥ ᐅᓪᓗᖅ ᓱᓕᓂᕐᒧᑦ ᐊᒻᒪ ᐱᒋᐊᒃᑲᓐᓂᕈᒪᓂᕐᒧᑦ ᐊᒻᒪᓗ ᐅᕕᓂᕈᕐᓯᒪᓇᕐᒥ, ᐅᐱᒋᕙᕗᑦ ᐊᓂᒍᐃᓂᑯᑦ ᐊᒻᒪᓗ ᓱᕈᓰᑦ ᐅᑎᓚᐅᕐᓯᒪᙱᑦᑐᑦ ᐊᖏᕐᕋᖏᓐᓄᑦ – ᐊᒻᒪᓗ ᐃᓱᒪᒋᓪᓗᑎᒍᑦ ᐊᑐᕐᑕᐅᓯᒪᓂᑯᐃᑦ ᐊᒻᒪᓗ ᒫᓐᓇᒧᑦ ᓱᓕ ᐊᒃᑐᐃᓯᒪᓂᖏᓐᓂ ᐅᑯᐊ ᐃᓕᓐᓂᐊᕆᐊᕐᕕᐅᕙᓚᐅᕐᑐᑦ.

ᐃᓕᓐᓂᐊᕆᐊᕐᕕᐅᕙᓚᐅᕐᑐᑦ ᓱᓕᓯᒪᔪᑦ ᒪᑯᐊ ᐊᓂᒍᐃᓂᑯᑦ ᐊᑐᕐᓯᒪᔭᖏᑦ ᐅᖃᐅᓯᕆᓯᒪᓪᓗᓂᔾᔪᑦ ᒐᕙᒪᒃᑯᑦ ᑕᐃᒪᐃᑎᓐᓇᒋᑦ. ᓱᓕᔪᑦ ᐅᖃᐅᓯᐅᓯᒪᔪᑦ 6,600-ᖏᕐᓱᖅᑕᐅᓯᒪᓪᓗᓂ ᓯᕗᓂᐊᓂ ᓱᓕᓂᖅ ᐊᒻᒪ ᐱᒋᐊᒃᑲᓐᓂᕈᒪᓂᕐᒧᑦ ᑲᒥᓴᓐ ᐱᒋᐊᓚᐅᕐᑎᓐᓇᒍ, ᑕᐃᒪᓕ ᒐᕙᒪᒃᑯᑦ ᐅᖃᕈᓐᓇᙱᑦᑐᑦ ‘ᖃᐅᔨᒪᓚᐅᙱᓐᓇᑦᑕ’. ᑕᒪᑐᒪᓂ ᐊᑯᓂᕈᓗ ᐊᒻᒪ ᐋᓐᓂᕐᓇᖅᑐᐊᓗᒃ ᐊᑐᕐᑎᓪᓗᒍ ᐊᑐᕐᓯᒪᔭᑦᑎᒍᑦ, 150,000 ᐅᖓᑖᓂ ᐊᓪᓚᐃᑦ, ᐃᓄᐃᑦ, ᐊᒻᒪ ᐊᓪᓚᖓᔪᐃᑦ ᓱᕈᓰᑦ ᐃᓚᖏᓐᓂ ᕿᒪᐃᓯᒪᑎᑕᐅᓚᐅᕐᒪᑕ, ᓄᓇᓕᖕᓂ, ᐅᖃᐅᓯᖏᓐᓂ, ᐊᒻᒪ ᐃᓕᖅᑯᓯᖏᓐᓂ.

ᒐᕙᒪᐅᓪᓗᑕ ᐊᒻᒪ ᐃᓅᓪᓗᑕ, ᐃᖅᑲᐅᒪᓂᖅ ᓇᓕᒧᒃᓯᐅᑎᓯᒪᔪᖅ ᑲᒪᒋᔭᖃᕆᐊᖃᕐᓂᕐᒥᓐ.

ᒐᕙᒪᑐᖃᒃᑯ ᓯᕗᒧᑦ ᐱᕙᓪᓕᐊᓇᓱᒃᑐᑦ ᐱᒻᒪᕆᖕᒥ ᐱᓕᕆᐊᒃᓴᒥ ᐆᒥᖓ ᓱᓕᓂᕐᒧᑦ ᐊᒻᒪ ᐱᒋᐊᒃᑲᓐᓂᕈᒪᓂᕐᒧᑦ ᑲᒪᓴᓐᑯᓐ ᐱᓕᕆᐊᕆᖁᔭᖓᓂ, ᐃᓚᖃᖅᖢᓂ ᓄᓇᖃᖅᑳᖅᑐᑦ ᓄᓇᓕᖏᓐᓂ ᐃᑲᔪᑲᑕᒡᓗᑎ ᓴᖅᑭᑎᑦᑎᓇᓱᒃᑎᓪᓗᒍ ᓇᓗᓇᐃᒃᑯᑎᖃᖅᑎᑕᐅᙱᑦᑐᑦ ᐃᓗᕕᕐᓂ ᐊᒻᒪ ᑎᑎᕋᐅᓯᐅᕐᓯᒪᙱᖢᑎᒃ ᐅᑯᓇᓂ ᐃᓕᓐᓂᐊᕆᐊᕐᕕᕕᓂᕐᓂ. ᐱᓕᕆᐊᕆᒃᑲᓐᓂᕋᓱᒐᑦᑎᒍᑦ ᒪᓕᒐᓕᕆᓂᖅ ᑲᓇᑕᒥ ᖃᐅᔨᓇᓱᒡᓗᑎᑦ ᑲᓇᑕᒥ ᐊᓯᐅᓯᒪᔪᓂᒃ ᐊᒻᒪ ᐃᓄᐊᖅᑕᐅᓂᑯᓂ ᓄᓇᖃᖅᑳᖅᑐᑦ ᐊᕐᓇᖏᓐᓂ ᐊᒻᒪ ᓂᕕᐊᕐᓵᓂ ᐊᒻᒪᓗ ᐊᑐᓕᖅᑎᑦᑎᓂᕐᒥᒃ ᔫᓇᐃᑕᑦ ᓇᐃᓴᓐᔅ ᐱᔪᓐᓇᐅᑎᖏᑦ ᓄᓇᖃᖅᑳᖅᑐᑦ ᒪᓕᒐᕐᒥᑦ.

ᐊᑕᐅᑦᑎᒃᑯᑦ ᓴᓇᒐᑦᑕ – ᐋᓐᓂᐊᖃᕐᓇᙱᑦᑐᓕᕆᓂᕐᒥ, ᐃᒡᓗᓕᕆᓂᕐᒥ, ᐃᓕᓐᓂᐊᖅᑐᓕᕆᓂᕐᒥ ᐊᒻᒪ ᑮᓇᐅᔭᓕᐅᕋᓱᒍᑎᒃᓴᓂ – ᐊᑐᕐᖢᑎᒍ ᓄᓇᖃᖅᑳᖅᑐᑦ ᐱᔪᓐᓇᐅᑎᖏ ᐊᒻᒪᓗ ᓄᓇᓕᖕᓂ ᓴᐳᔾᔨᓯᒪᓂᕐᒥ ᐊᒻᒪ ᐱᕙᓪᓕᐊᓂᕐᒥᒃ. ᑲᓇᑕᐅᑉ ᓄᑖᖅ ᒐᕙᒪᖓ ᐱᓕᕆᖃᑎᖃᕐᓂᐊᖅᑐᑦ ᐃᓱᒪᒋᔭᖃᕐᓗᑎ ᐱᓇᓱᐊᒐᕆᔭᐅᔪᓂᒃ, ᒪᑯᐊᓗ ᓯᕗᓪᓕᐅᑎᓯᒪᓇᓱᖕᓂᖏᓐᓂ ᓄᓇᖃᖅᑳᖅᑐᑦ ᓇᓕᒧᒌᖕᓂᒃᑯᑦ ᐊᒻᒪ ᐱᖃᖃᑕᐅᓂᕐᒧᑦ ᒪᑯᓂᖓ ᐱᕈᖅᑎᑦᑎᕙᓪᓕᐊᓂᕐᒥ ᐊᒻᒪᓗ ᐃᓕᓴᕐᓯᓯᒪᓂᕐᒥ ᐱᓕᕆᖃᑎᒌᖕᓂᕐᒥ ᐊᒻᒪᓗ ᑲᓇᑕᒥ ᓄᓇᖃᖅᑳᖅᑐᑦ ᐊᒻᒪ ᓄᓇᖃᖅᑳᙱᑦᑐᑦ ᓂᐱᖏ ᓯᕗᓕᐅᖅᑎᐅᑎᑕᐅᑎᓪᓗᒋᑦ ᓄᓇᒥ ᑲᒪᒋᔭᖃᕐᓂᕐᒥᒃ.

ᐱᒻᒪᕆᐊᓘᒻᒪ ᐱᕈᖅᑎᑦᑎᕙᓪᓕᐊᒍᑦᑕ, ᐊᒻᒪᓗ ᐱᒻᒪᕆᐅᒋᓪᓗᓂ ᖃᓄᖅ ᐱᕈᖅᑎᑦᑎᕙᓪᓕᐊᓂᕗᑦ – ᒪᑯᓂᖓ ᓄᓇᖃᖅᑳᖅᑐᓂ ᓯᕗᓕᐅᖅᑎᐅᓂᕐᒥ, ᐱᕙᓪᓕᐊᑎᑦᑎᓂᕐᒥᒃ ᐊᒻᒪ ᑐᙵᕕᐅᓕᕈᓐᓇᕐᓂᕐᒥᒃ. ᐋᖅᑭᒋᐊᒃᑲᓐᓂᕋᓱᖕᓂ ᑭᖑᕚᕇᖕᓄᑦ ᐱᓕᕆᐊᒃᓴᐅᔪᖅ – ᐊᑐᖅᑕᐅᕙᒃᖢᓂ ᖃᐅᑕᒫᓐ.

ᐅᖃᕐᑐᒍᑦ ᓯᕗᓂᒃᓴᒥ ᓴᓇᓂᐊᕈᒪᓪᓗᑕ ᒪᑯᐊ ᐊᓂᒍᐃᓯᒪᔪᑦ ᐃᓱᒪᒋᔭᐅᓂᖏᑦᑎᒍᑦ, ᒪᓕᒐᖅᑎᒍᑦ ᐊᒻᒪ ᓴᖏᓂᕐᓴᑎᒍᑦ ᑲᓇᑕᒥ.”

ᑐᓴᒐᒃᓴᒃᑲᓐᓃᑦ: ᐃᑲᕐᕋᑦ 24-ᓂ ᐊᑐᐃᓐᓇᐅᔪᖅ ᑲᓇᑕᒥ ᐃᓕᓐᓂᐊᕆᐊᕕᓕᐊᕐᓂᑯᑦ ᐅᖄᓚᕝᕕᒋᔪᓐᓇᖅᑕᖓ, ᐊᑐᐃᓐᓇᐅᓪᓗᓂ ᐅᕙᓂ 1-866-925-4419, ᓇᓗᓇᐃᕐᓯᔪᓐᓇᕐᑐᑦ ᐱᔨᑦᑎᕋᐅᑎᓂ ᐊᓂᒍᐃᓯᒪᔪᓄᑦ ᐃᓚᖏᓐᓄᓪᓗ ᐊᒻᒪᓗ ᓇᓗᐃᕐᓯᓯᒪᓪᓗᓂ ᖃᓄᖅ ᐋᓐᓂᐊᕕᖕᒥ ᑲᒪᒋᔭᐅᔪᓐᓇᕐᒪᖔᖏᓐᓂ ᐅᑯᓇᙵ ᑲᓇᑕᒥ ᒐᕙᒪᒃᑯᓐᓂ. ᐅᓇ ᓂᕆᐅᖕᓂᖅ ᖃᓄᐃᑦᑕᐃᓕᒪᓂᕐᒥ ᐃᑲᔫᑎ ᐅᖄᓚᐅᑦ ᑭᐅᔭᐅᑲᐅᑎᒋᕙᒃᑐᖅ ᐊᑭᖃᙱᖢᓂ ᐊᒻᒪᓗ ᖃᕋᓴᐅᔭᒃᑯᑦ ᑎᑎᕋᑲᑕᒡᓗᑎᒃ ᐅᖃᓪᓚᖃᑎᖃᕈᓐᓇᖅᖢᑎᒃ ᐊᒻᒪᓗ ᐊᒃᓱᕈᓐᓇᓗᐊᖅᑐᓄᑦ ᓴᐳᔾᔨᓯᒪᓇᓱᒃᖢᑎᒃ ᓄᓇᖃᖅᑳᖅᑐᓕᒫᓂᒃ ᑲᓇᑕᒥ. ᑕᒪᐃᓐᓂ ᐅᖄᓚᐅᑎ ᐊᒻᒪ ᖃᕋᓴᐅᔭᒃᑯᑦ ᐅᖃᖃᑎᖃᕈᓐᓇᕐᓂ ᐊᑐᐃᓐᓇᐅᔪᑦ 24/7 ᖃᓪᓗᓈᑐᑦ ᐊᒻᒪ ᐅᐃᕖᑐᑦ. ᐅᖄᓚᐅᑎᒃᑯᑦ ᐃᑲᔪᖅᑕᐅᔪᓐᓇᕐᒥᔪᑦ ᐱᔪᒪᒍᑎ ᐅᖃᐅᓯᑎᒍᑦ ᑯᕇ, ᐊᑉᔨᑉᕗᐃ, ᐊᒻᒪ ᐃᓄᒃᑎᑐᑦ. ᐊᔪᕈᓐᓃᖅᓴᖅᑕᐅᓯᒪᔪᑦ ᐃᓅᓯᓕᕆᔩᑦ ᐊᑐᐃᓐᓇᐅᔪᑦ ᐅᕙᙵᑦ 1-855-242-3310 ᐅᕝᕙᓘᓐᓃᑦ ᐅᕘᓇ hopeforwellness.ca.