“ᐁᑲᐧ ᒥᓂᓂᑫᐃᐧᐣ ᐱᒥᐊᔭᒪᑲᐣ, ᒥᓇ ᐱᒪᑎᓯᑲᒋᑲᑌ ᐁᑲᐧ ᐱᒥᐊᓄᑲᒋᑲᑌ ᑕᓱᑭᔑᑲ. ᐁᑲᐧ ᐅᐁᐧ ᒥᓯᐁᐧᑲᒥᐠ ᑲᒥᑲᐃᐧᐣᒋᑲᑌᐠ ᑌᐯᐤᐃᐧᐣ ᒥᓇ ᒥᓂᓂᑫᐃᐧᐣ ᐁᑲᐧ ᒥᐢᑯᐅᓴᐃᐧᐱᑕᐁᐧᐡᑭᑲᐣ ᑭᔑᑲᐣ, ᓂᒥᑲᐃᐧᐣᑕᐊᐧᒥᓇᐠ ᐁᐧᐡᑲᐨ ᐱᐅᑕᓇᐠ ᑲᑭᐃᔕᐊᐧᐨ ᐃᐡᑯᓄᐃᐧᓂᐠ ᒥᓇ ᐊᐊᐧᔑᔕᐠ ᐁᑲ ᑲᑭᐅᒋᐱᑫᐁᐧᐊᐧᐨ – ᐁᑲᐧ ᒥᓇ ᐁᒥᑲᐃᐧᐣᑕᒪᐠ ᑲᑭᒪᒋᒋᑫᒪᑲᐠ ᐅᐁᐧ ᐃᐡᑯᓄᐃᐧᐣ ᒥᓇ ᐱᑯ ᑭᔭᐱᐨ ᑲᐱᒥᒪᒋᑐᑕᐁᐧᒪᑲᐠ ᐅᐁᐧ ᐱᐅᑕᓇᐠ ᐁᐧᐡᑲᐨ ᐃᐡᑯᓄᐃᐧᐣ ᑲᑭᐱᒧᒋᑲᑌᑭᐸᐣ.
ᐁᑲᐧ ᐱᐅᑕᓇᐠ ᐁᐧᐡᑲᐨ ᐃᐡᑯᓄᐃᐧᐣ ᑌᐯᐤᐃᐧᓂᐊᐧᐣ ᑲᑭᑭᑫᐣᑕᒧᐊᐧᐨ ᐁᐧᐡᑲᐨ ᐅᑎᐡᑯᓂᐠ ᐁᑲ ᐅᑕ ᐅᑭᒪᐃᐧᐣ ᑲᑭᐅᒋᑌᐯᐤᑕᐠ. ᐅᐁᐧ ᑌᐯᐤᐃᐧᐣ ᒥᔑᓂᐊᐧ ᑭᐱᒥᐊᓂᒧᒋᑲᑌ ᓇᐣᑕ ᐱᑯ ᒪᒪᐤ 6,600 ᑕᓴᐧ ᑲᒪᐧᔦ ᐅᓇᓴᑲᓄᐊᐧᐨ ᑌᐯᐤᐃᐧᐣ ᒥᓇ ᒥᓂᓂᑫᐃᐧᐣ ᐅᑕᓄᑭᑕᒪᑫᐠ, ᐁᑲᐧ ᐊᐱᐣ ᑭᐃᔑᓭ ᐅᑭᒪᐃᐧᓇᐣ ᐁᑲ ᒋᑭᐃᑭᑐᐊᐧᐨ ‘ᑲᐃᐧᐣ ᒋᑭᐅᒋᑭᑫᐣᑕᒪᐠ’. ᐁᑲᐧ ᐅᐁᐧ ᒪᐊᐧᐨ ᑭᓇᐧᑲᐢ ᑲᑭᐱᒥᓭᒪᑲᐠ ᐃᐧᓴᑫᐣᑕᒧᐃᐧᐣ ᐅᒪ ᑲᓇᑕ, ᐊᐊᐧᔑᒣ 150,000 ᐊᓂᔑᓇᐯᐃᐧ, ᐁᓂᐃᐧᐟ, ᐁᑲᐧ ᐃᐧᓴᑯᑌᐃᐧ ᐊᐊᐧᔑᔕᐠ ᑲᑭᐅᑕᐱᓇᑲᓄᐊᐧᐨ ᐅᑎᐯᐣᒋᑫᐃᐧᓂᐊᐧᐠ, ᐅᑕᔑᑫᐃᐧᓂᐊᐧᐠ, ᐁᑲᐧ ᑲᑭᐊᐧᓇᒋᑲᑌᓂᐠ ᐅᑎᔑᑭᔑᐁᐧᐃᐧᓂᐊᐧᐣ ᒥᓇ ᐅᑎᔑᐱᒪᑎᓱᐃᐧᓂᐊᐧᐣ.
ᐁᑲᐧ ᐅᐁᐧ ᐅᑭᒪᐃᐧᐣ ᒥᓇ ᐅᑫᐧᓂᐊᐧᐠ ᐊᐃᐧᔭᐠ, ᓂᑕᐱᑕ ᒪᒥᑎᓀᐣᑕᒥᐣ ᐅᐁᐧ ᐸᐸᒥᓯᐃᐧᐣ ᐅᒋ.
ᐁᑲᐧ ᑲᓇᑕ ᐅᑭᒪᐃᐧᐣ ᐊᒥᐁᐧ ᐱᑯ ᑫᐃᔑᐱᒥᐃᐧᒋᑐᐨ ᐅᐁᐧ ᑲᑭᑌᐣᑕᑲᐧᐠ ᑲᐱᒥᐊᓄᑲᑌᐠ ᑌᐯᐤᐃᐧᐣ ᒥᓇ ᒥᓂᓂᑫᐃᐧᐣ ᐅᑕᓄᑭᒪᑫᐠ ᐅᑲᓄᒋᑫᐃᐧᓂᐊᐧᐣ ᒋᐊᐧᑲᐃᐧᑕᒪᐠ, ᒥᓇ ᒋᐃᐧᒋᑐᔭᑭᐣ ᐊᓂᔑᓇᐯᐃᐧ ᑕᔑᑫᐃᐧᓇᐣ ᒥᐡᑯᐨ ᒋᒥᑭᑲᑌᑭᐣ ᐁᑲ ᑲᑭᐅᒋᑭᑭᓇᐧᒋᒋᑲᑌᑭᐣ ᒥᓇ ᐁᑲ ᑲᑭᐅᒋᒪᓯᓇᐦᐃᑲᑌᑭᐣ ᓂᑲᐧᐊᐧᑲᓇᐣ ᐃᒪ ᐱᐅᑕᓇᐠ ᐁᐧᐡᑲᐨ ᐃᐡᑯᓄᐃᐧᑲᒥᑯᐣ ᑲᑭᐃᔑᑕᑲᐧᑭᐣ. ᐁᑲᐧ ᐊᔕᔾ ᒥᐡᑕᐦᐃ ᓂᑕᓄᑲᑕᒥᓇᐣ ᑲᓄᒋᑫᐃᐧᓇᐣ ᐅᒪ ᐅᓇᑯᓂᑫᐃᐧᓂᐠ ᑲᐅᒋᐊᓄᑲᑌᐠ ᒥᓯᐁᐧ ᐊᓂᒧᒋᑫᐃᐧᐣ ᐅᑫᐧᓂᐊᐧᐠ ᑲᐊᐧᓂᔭᑲᓄᐊᐧᐨ ᒥᓇ ᑲᑭᓂᓴᑲᓄᐊᐧᐨ ᐊᓂᔑᓇᐯᐃᐧ ᐃᑫᐧᐊᐧᐠ ᒥᓇ ᐃᑫᐧᓭᓴᐠ ᐁᑲᐧ ᐅᐁᐧ ᑲᔭᐸᒋᒋᑲᑌᐠ ᔪᓇᔾᐃᑎᐟ ᓀᐦᐃᔑᐣᐢ ᑭᒋᐅᓇᒋᑫᐃᐧᐣ ᑕᐱᐡᑯᐨ ᑭᑫᐣᒋᑫᐃᐧᓇᐣ ᑲᔭᑌᑭᐣ ᐅᒪ ᐊᓂᔑᓇᐯᐃᐧ ᐅᓇᔓᐁᐧᐃᐧᓂᐠ.
ᐁᑲᐧ ᑭᒪᒪᐃᐧ ᐊᓄᑲᑕᒥᓇᐣ – ᒪᐡᑭᑭᐃᐧ ᐱᒧᒋᑫᐃᐧᐣ, ᐊᐧᑲᐦᐃᑫᐃᐧᐣ, ᑭᐦᑭᓄᐦᐊᒪᑫᐃᐧᐣ, ᐁᑲᐧ ᔓᓂᔭᑫᐃᐧ ᐅᒋᑕᒪᓱᐃᐧᐣ – ᐁᔭᐸᒋᑐᔭᐠ ᐊᓂᔑᓇᐯᐃᐧ ᑭᑫᐣᒋᑫᐃᐧᓇᐣ ᒥᓇ ᐁᒪᐡᑲᐃᐧᓯᑐᔭᑭᐣ ᑕᔑᑫᐃᐧᓇᐣ ᐅᒪ ᑲᓇᐁᐧᐣᒋᑫᐃᐧᓂᐠ ᒥᓇ ᒥᓄᓭᐃᐧ ᐅᒋᑕᒪᓱᐃᐧᓂᐠ. ᐁᑲᐧ ᑲᓇᑕ ᐅᐡᑭ ᐅᑭᒪᐃᐧᐣ ᒪᐊᐧᐨ ᐅᑲᑭᑌᐣᑕᓇᐣ ᐃᐧᑕᓄᑭᒥᑐᐃᐧᓇᐣ, ᒥᓇ ᒋᓂᑲᓂᑲᓇᐊᐧᐸᑕᐠ ᐊᓂᔑᓇᐯᐃᐧ ᐃᐧᒋᐦᐃᐁᐧᐃᐧᐣ ᒥᓇ ᒪᒪᐃᐧ ᐱᒧᒋᑫᐃᐧ ᑐᒋᑫᐃᐧᐣ ᑕᐱᐡᑯᐨ ᑲᐱᒥᐊᐧᐁᐧᓇᒋᑲᑌᑭᐣ ᐸᑯᓭᐣᒋᑫᐃᐧᓇᐣ, ᒥᓇ ᒋᓂᓯᑕᐃᐧᓂᑲᑌᐠ ᑲᐧᔭᐠ ᒋᐃᔑᓇᑲᐧᐠ ᐅᐁᐧ ᑌᐯᐤᐃᐧ ᐃᐧᑕᓄᑭᒥᑐᐃᐧᐣ ᒥᓇ ᑲᐸᑯᓭᐣᑕᑲᐧᐠ ᒪᒪᐃᐧ ᓂᓯᑐᑕᑎᐃᐧᐣ ᐁᑲᐧ ᒥᓇ ᑲᐅᔑᒋᑲᑌᐠ ᑲᓇᑕ ᑲᐃᔑᐸᑯᓭᐣᑕᑯᓯᐨ ᑐᑲᐣ ᐊᓂᔑᓇᐯᐃᐧ ᐁᑲᐧ ᒥᓇ ᐁᑲ ᑲᐊᓂᔑᓇᐯᐃᐧᐊᐧᐨ ᑫᑯᓇᐣ ᑲᓂᑲᓂᑲᓄᑕᒧᐊᐧᐨ ᑕᐱᐡᑯᐨ ᐅᒪ ᒪᒪᐃᐧ ᐊᐦᑭᐃᐧ ᑲᓇᐁᐧᐣᒋᑫᐃᐧᓂᐠ ᐅᒋ.
ᐁᑲᐧ ᒪᐊᐧᐨ ᑭᑌᐣᑕᑲᐧᐣ ᐅᐁᐧ ᒋᐅᔑᒋᑲᑌᐠ, ᒥᓇ ᑕᐱᑕ ᒋᑲᓇᐊᐧᐸᒋᑲᑌᐠ ᐊᓂᐣ ᑫᐃᔑᓇᑲᐧᐠ ᐃᐧᑕᓄᑭᒥᑐᐃᐧᐣ – ᑐᑲᐣ ᑲᐃᐧᑕᓄᑭᒪᔭᐠ ᐊᓂᔑᓇᐯᐃᐧ ᐅᓂᑲᓂᑕᒪᑫᐠ, ᒥᓇ ᒥᓄᓯᐃᐧᓇᐣ, ᐁᑲᐧ ᐅᒋᑕᒪᓱᐃᐧᐣ ᒋᔭᐸᒋᒋᑲᑌᐠ ᒪᒋᒋᑫᐃᐧᓂᐠ. ᒪᐊᐧᐨ ᑭᒋᓀᐣᑕᑲᐧᐣ ᐅᐁᐧ ᒥᓂᓂᑫᐃᐧᐣ – ᐅᐁᐧ ᑲᐱᒪᑎᓯᑲᑕᒪᐠ ᒥᓇ ᑲᐱᒥᐊᓄᑲᑕᒪᐠ ᑕᓱᑭᔑᑲ.
ᐁᑲᐧ ᓂᐸᑯᓭᐣᑕᒥᐣ ᒋᐅᔑᑐᔭᐠ ᐊᓂ ᓂᑲᐣ ᐁᐧᐡᑲᐨ ᐅᑎᐡᑯᓂᐠ ᒋᑭᑌᓂᒪᑲᓄᐊᐧᐨ ᒥᓇ ᒋᒥᑲᐃᐧᐣᑕᐊᐧᑲᓄᐊᐧᐨ, ᒥᓇ ᒋᐃᐧᒋᐦᐃᔭᑲᓄᐊᐧᐨ ᐅᓇᑯᓂᑫᐃᐧᓂᐠ, ᐁᑲᐧ ᒥᓇ ᒋᒪᐡᑲᐃᐧᓯᒪᑲᐠ ᐅᐁᐧ ᑲᓇᑕ.”
ᐁᑲᐧ ᐊᐊᐧᔑᒣ ᐃᐧᑭᑫᐣᑕᒪᐣ : ᐁᑲᐧ ᐅᐁᐧ 24 ᑕᓴᐊᐧᑲᓭ ᐊᔭᑲᐧᒥᓯᐃᐧᐣ ᒥᓇ ᑲᓇᐁᐧᐣᒋᑫᐃᐧᐣ ᒥᓯᐁᐧ ᐁᐧᐡᑲᐨ ᐃᐡᑯᓄᐃᐧᐣ ᐃᐧᒋᐦᐃᐁᐧᐃᐧᐣ ᒪᒋᑭᑐᐃᐧᐣ, ᐁᑲᐧ ᐅᐁᐧ ᐊᑭᑕᓱᐣ 1-866-925-4419, ᒥᐡᑯᐨ ᒋᐃᐧᑕᒪᐊᐧᑲᓄᐊᐧᐨ ᐁᐧᐡᑲᐨ ᐅᑎᐡᑯᓂᐠ ᒥᓇ ᐅᑎᐯᐣᒋᑫᐃᐧᓂᐊᐧᐣ ᐃᐧᒋᐦᐃᐁᐧᐃᐧᓇᐣ ᑲᑕᑲᐧᓂᓂᑭᐣ, ᐁᑲᐧ ᒥᓇ ᐁᐃᐧᑕᒪᑫᒪᑲᐠ ᐊᐣᑎ ᒪᐡᑭᑭᐃᐧ ᐃᐧᒋᐦᐃᐁᐧᐃᐧᓇᐣ ᑫᐅᑎᓇᒪᓂᐣ ᐅᐊᐧᐁᐧ ᑲᓇᑕ ᑲᐸᑭᑎᓇᑭᐣ. ᐁᑲᐧ ᐸᑯᓭᓂᒧᐃᐧᐣ ᐃᐧᒋᐦᐃᐁᐧᐃᐧᐣ ᓀᐃᐧᐨ ᐅᐸᑭᑎᓇᐣ, ᐁᑲ ᑲᑎᐸᐦᐃᑲᑌᐠ ᒪᒋᑭᑐᐃᐧᐣ ᑫᐃᔑᑭᑐᓇᓂᐊᐧᐠ ᐁᑲᐧ ᒥᓇ ᐱᐊᐧᐱᑯᐠ ᐃᐧᒋᐦᐃᐁᐧᐃᐧᐣ ᑲᑕᑲᐧᐠ ᒥᓇ ᑭᒋᐃᔑᓭᐃᐧᐣ ᑲᐅᒋᐃᐧᒋᐦᐃᔭᑲᓄᐊᐧᐨ ᐅᑫᐧᓂᐊᐧᐠ ᑲᑭᓇ ᐊᓂᔑᓇᐯᐠ ᐅᒪ ᑲᓇᑕ. ᐁᑲᐧ ᒪᒪᐤ ᒪᒋᑭᑐᐃᐧᐣ ᒥᓇ ᐱᐊᐧᐱᑯᐠ ᐃᐧᒋᐦᐃᐁᐧᐃᐧᓇᐣ ᐸᑭᑎᓂᑲᑌᐊᐧᐣ 24/7 ᐁᐧᒥᑎᑯᔑᒧᐃᐧᓂᐠ ᒥᓇ ᐸᑲᐤᔑᒧᐃᐧᓂᐠ. ᐁᑲᐧ ᒪᒋᑭᑐᐃᐧᐣ ᐃᐧᒋᐦᐃᐁᐧᐃᐧᐣ ᑭᐡᐱᐣ ᑲᐅᒪᐡᑭᑯᒪᑲᐠ, ᑲᐊᓂᔑᓇᐯᒧᒪᑲᐠ, ᐁᑲᐧ ᐃᓄᐠᑎᐟᑐᐟ ᑲᐃᔑᑭᔑᐁᐧᒪᑲᐠ ᓇᑐᑕᒪᔦᐠ ᑲᔦ ᑲᐅᒋᑕᒪᑯᓇᐊᐧ. ᑲᐅᒪᓯᓇᐦᐃᑲᓀᔑᐊᐧᐨ ᐅᑕᔭᒥᐦᐃᐁᐧᐠ ᑲᔦ ᐊᔭᐊᐧᐠ ᐅᒪ 1‑855‑242‑3310 ᓇᐣᑕ ᐱᐊᐧᐱᑯᐠ espoirpourlemieuxetre.ca.