“Horegoth Nųt’á hadé horı̨cha hası̨, bek’enats’edé chu dzı̨ne danełt’u hołe hoɂą. Ku ɂedırı Horelyų Nąne Hoɂá Dzı̨ne nųt’a t’a Ɂełtth’ı chu Horegoth Nųt’a ha chu Jıtthoghe lahot’ı̨ dısısɂı̨h Ɂahot’ı̨ Dzı̨ne, t’ą Hadaghı̨na benahonı̨ hoɂą t’ą beskęnę bekuę nı̨del hılé sı tth’ı hu – ɂeyı hel danılɂı̨h hoɂą t’a ɂedırı t’a due nodher sı bası chu dųhų bet’a t’ąt’u dene dadatheɂá dene xare kuę bet’a.

Dene xare kuę daghı̨la bet’a t’ą Hadaghı̨na sı beyatıe ɂełtth’ı nı̨ t’ą k’oldhe kodanı̨dhęn hıle kulı. Ɂeyı behonı̨̨ye ɂełtth’ı sı 6,600 dene koradı ɂa t’a Ɂełtth’ı chu Horegoth Nųt’á ha dene hudel kots’edı nı̨, t’ą k’oldé ɂedırı ghadalana ha due dųhų hel ’yek’odorelyą hıle tth’ı dadı ha due dųhų’. Ku ɂedırı t’anodher nı̨sı tha hudher hel dene łą dadaghı̨ɂa nı̨ ɂedırı t’a, k’asjene 150,000 ɂąsı Denededłı̨ne, Hotena chu Begharek’ą ts’ı̨ɂąne sekuı bekuę ch’ası hełya hu beyatıe, bech’alanı̨ye beghą dodı haja nı̨.

Ku nunı̨ t’a k’ohıldé chu dene daıdłı̨, hotıe ɂedırı t’anodher bedanaılnı̨ chu t’anodher sı nuhehel nodher sı.

T’ą nane hoɂá k’oldé ɂedırı ɂası yunadhé naıłna ha t’a yuné yatı holı̨ nı̨sı t’a Ɂełtth’ı chu Horegoth Nųt’a yatı bet’a Ɂası Naılna ha, ɂedırı dene ts’erenı̨ t’ok’e sekuı seralya nı̨sı dene xare kuę ga. Ku nunı̨ ɂeyı t’a Hozeker sı Sughua hots’ęn naılna tth’ı hası̨ t’oho Ts’ekuı, sekuı t’ą dolé behayaı̨tı nı̨sı hots’ı̨ ɂedırı yatı nedhé holı̨ nı̨ United Nations Nı̨h banı̨ Yatı Nedhé holı̨ t’a Denededłı̨ne hok’anota ha.

Ɂeła ɂedırı hıltsı sı – dene nakoghodı ha hu, yeh hegą, ɂerıthł’ıs kuę chu la hołe dąlı̨ bası – Denededłı̨ne t'ąt'u daghena k'anota chu t'ok'e naradé sı bel nezų nųt'a chu bel ɂası łą nodhı hodorılɂı̨h. Canada t’a deghoth hok’enadé hadé t’ą k’oldé hotıe dene hel ɂası k’enadé ha dene tthęnę nakoreldé ba nųt’a hu, t’a ɂeyı ląt’e ɂası tthere halyé Denededłı̨ne ba bet’a horegoth ɂası hołe ha, ɂeyı chu t’a ɂası nezų k’anota hu bet’a hotıe ɂełneredı k’e nųt’a ha, ɂeyı t’a Canada yek’orelyą ha Dene hel ɂeła dene nęnę k’e ɂası hołe dezą.

ku ɂeyı tthere hoɂą hıłtsı hadé, kulı ɂeła dezą t’ąt’u nodhı ha – Denededłı̨ne hel haılyé hadé, ɂeyı t’a dene hel hoɂą tthere dezą. Horegoth Nųt’á hade dene ɂełk’ı̨nı̨ yek’enadé dezą – dzı̨ne danełt’u hołe hoɂą.

Ku nuhnı̨ ɂedırı hıłtsı ha yunadhé dene t’a Hadaghı̨na sı benahonı̨ hel beba ɂası hołe hoɂą, sughua hel Canada nąne hoɂa naı̨tser ha bet’a.”

Ku ɂałų beghą yatı horı̨lɂı̨h de: 24-sadzıe k’etł’a dene xa hoɂąsı bel yanełtı ha Nąne hoɂa Dene xare kuę t’a ɂesónı̨dhęn de dene hel yanetłı ha, ɂeją ts’ęn dųłtsı nanı̨le1-866-925-4419, dene hel yatı chu dene ts’edı ha hoɂą t’ą dene Hadaghı̨na sı chu bets’ı̨ɂąne ba t’ąt’u bets’edı walı sı bası Canada t’ą K’oldé betł’esé nųt’ą sı. Ɂedırı Sughua ɂehena honıdhęn ha nųt’ą dene ts’edı ha nųt’a nanı̨le horelyų Canada nąne hoɂą bası Denededłı̨ne ba. Bą́nełt’u phone ku tsątsąne benı̨ hųlı̨ k’e dene hel yatı ha hoɂą dzı̨ne k’etł’a 24/7. Tthot’ı̨ne chu Bąlaı yatı ɂa. Phone k’e denets’edı ha hoɂą, Ɂena, Ojıbway chu Hotena yatı t’a. Dene ts’eranı̨ ha hodonełtęn̨ dene nodorełɂı̨h sı ɂeją ts’ęn dųłtsı 1‑855‑242‑3310 huto ɂeją ts’ęn dųtł’ıs espoirpourlemieuxetre.ca.