“Weechiwawhkoostouwin si aykwawnima awn partawn li moud atoushkaywin, pimawtishinaniwan pi ayisihchikaywin tou lee zhour. Ooma ishipee Mishiway itay En zhournee d’ La Vayritee pi Weechiwawhkoostouwin pi aen Narawnzh la Shmeezh en Zhournee, kischaymananik Ishkounikanak pi lee zawnfawn namoo kaw-kee-ouschi keeweewak – pi kimamitounayihtaynaw mishiwanachipayiwin kaw-nakatamakayhk pi ahkamay mawkouhtawina ouschi itaykawweekihk l’ikol pamischikaywin.
Itaykawweekihk l’ikol aykwawnihi la vayritee Ishkounikanak kaw-tahkounahkik ishpee li gouvarnimaw namou wiya. La vayritee kishkishow ayiwawk 6,600 tahtwow avawn ooma La vayritee pi Weechiwawhkoostouwin Neepawistamakaywin, akousheeshi li gouvarnimaw namou chikee itwayw ‘namou aykee-kishkayistamahk’. Maykwawt ishpee ooma kinwaysh pi weeshakayistawkwun kayawsh ashpin ouschi, ayiwawk 150,000 Li Promyee Nawsyoon, aen Niskimoo, pi en Michif lee zawnfawn kee-pashkaynawak ouschi see famee, alawntour, la lawngaezh, pi kee-ishipimawchihounawniwun.
Ishi li gouvarnimaw pi li moond, kikwayashkashtawnaw kishkishiwin avek pishkayimiwawn.
Kischee li gouvarnimaw yahkouhtayw neekawnihk ishi aenportaan atoushkaywin ouschi La vayritee pi Weechiwawhkoostouwin Peehkishkwayshtamakayw sa Taypwachikaywin ishi Nawkatahkawtamouwin, avek weechihiwaywin Indigene alawntour chi-mishka pat en maerk pi namoo kishkishitoutawaywin lee foos pi nahinewina itaykawweekihk l’ikol. Neekawnipayistawnawn ooma Taypwachikaywin poor Kwayashkwatishiwin ouschi Mishiway itay Kakwaychihkaymoowin ishi Namataywak akwa Nipahawak Indigene Lee Faem pi Lee Fee pi pimoustatawniwan ouschi Tooroon Not Grawn Piyee Nawsyoon Weestamakaywin didawn Lee Drway di Indigene Li moond la lway.
Tout awnsambl kayoushihtawnawn – ishi la sawntee nakatouhkaywin, lee maezoun, kishkinwahamakaywin, pi mawachischikaywin li shawns – manawchistawn Indigene lee drway pi shouhkahtwawin alawntour avek natamoushtawkaywin pi miyeupimawchihoowin. Kenadaw sa neu li gouvarnimaw aykwawna shouhkayistam en partineuz ishi kishchayistamoowin ahkamayihtumowin, ishi neekawnayistamoowin Indigene kwayesh chi-toutamakayhk pi weechi-tipayistamoowin ishi kischee- kishtayihtakwuniwan kwayshkinakoustawin, pi ishi nishtawinamoowin aykwawnima vray true weechayhtoowin neekawn natawayistakwan weechi nishitoustamoowin pi aykwawnima kaw-oushishtahk Kenadaw natawayistakwan Indigene pi namoo-Indigene peekishkwaywin chi-neekwanihk didawn oohin weechayhtoowin pishishkayischikaywin ouschi ooma la tayr.
Akouz kischayistawan chi-oushishistayahk, mawka payyekwan kischayistawan tawnsheeshi kaw-oushishistayahk – avek Indigene neekawneewin, miyeupimawchihoowin, pi li shawns aywawnima neekawnistawin. Weechiwawhkoostouwin si aykwawnima awn partawn li moud atoushkaywin – pimatishinaniwan pi ayshihchikawtayw tou lee zhour.
Niashoutamawkaynawn chi-oushishtahk li tawn ki vyayn itay Ishkounikanak kischayimawak avek kishkishouwin, avek kwayashkwatishiwin, pi avek shoohkaymakan Kenadaw.”
Poor ayiwawk weehstamakaywin: Ooma tuhkinay il i pat dawnzee pi tosal Mishiway itay Itaykawweekihk l’ikol Mayipayiwin Shaywaypichikan, ihtakon itay 1-866-925-4419, mekiw mayipayiwin kakayeshkimiwaywin pamihiwaywina ishi Ishkounikanak pi see famee pi weestamawinawn tawnsheeshi chi-kawschitinamaen kootak la sawntee weechihiwaywin ouschi Li Gouvarnimaw di Kenadaw. Ooma Pakoushaymoowin poor Miywayawin Weechihiwaywin Shaywaypichikan mekiw shaymawnk, mouschi shaywaypichikan en foonn pi daw li computer mouhchipawhpeekishwaywin-itouwahk peekwayihtamoowin pamihiwaywina pi mayipayiwin kipishkamakaywin ishi kahkiyow Indigene li moond didawn Kenadaw. Tou lee deu li foonn pi daw li computer mouhchipawhpeekishwaywin-itouwahk pamihiwaywina ihtakwan too lee zhour ishi L’Awnglay pi L’Kenayaen. Li foonn weechihiwaywin meena ihtakwan ishpee kaw-natouchikawtayk ishi Awn Cree, Anishinaabeg, pi aen Niskimoo. Nakawchihtamihiwaywak kakayeshkimaywaywak ihtakowak itay 1‑855‑242‑3310 keema shawpou espoirpourlemieuxetre.ca.