ᐅᓪᓗᒥ, ᑲᓇᑕᐅᑉ ᓯᕗᓕᐅᖅᑎᕐᔪᐊᖓ, ᒫᒃ ᑳᓂ, ᐊᖓᔪᖅᑳᖓᑦ ᐃᓄᐃᑦ ᑕᐱᕇᑦ ᑲᓇᑕᒥ, ᓇᐃᑕᓐ ᐅᐱᑦ, ᒐᕙᒪᑐᖃᒃᑯᑦ ᒥᓂᔅᑕᐃᑦ ᑲᑎᒪᔨᑦ, ᐊᒻᒪᓗ ᓂᕈᐊᖅᑕᐅᓯᒪᔪᑦ ᐃᓄᐃᑦ ᓯᕗᓕᐅᖅᑎᑦ ᑖᒃᑯᓇᖔᖅᑐᑦ ᐃᓅᕕᐊᓗᐃᑦ ᑯᐊᐳᕆᓴᓐ, ᓄᓇᕗᑦ ᑐᓐᖓᕕᒃ ᑎᒥᖓ, ᒪᑭᕕᒃ, ᐊᒻᒪᓗ ᓄᓇᑦᓯᐊᕗᑦ ᒐᕙᒪᒃᑯᑦ ᑲᑎᒪᓚᐅᖅᑐᑦ ᐃᓄᐃᓪᓗ ᑲᓇᑕᒥ ᒐᕙᒪᖓᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐃᓅᕕᖕᒥ, ᓄᓇᑦᓯᐊᖅ.
ᑕᐃᒪᖓᓂᑦ ᐊᑎᓕᐅᖅᑕᐅᓚᐅᕐᒪᑦ ᐃᓄᐃᑦ ᓄᓇᖓᑦ ᓱᓕᓂᕋᐅᑎ ᑕᐃᑲᓂ 2017, ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᐃᓄᐃᑦ ᓯᕗᓕᐅᖅᑎᑦ ᑲᔪᓯᔪᑦ ᑲᑎᒪᖃᑦᑕᕐᓂᖓᑦ ᐱᖓᓱᐃᖅᖢᑎᒃ ᐊᕐᕌᒍᒥ ᐊᒻᒪᓗ ᐋᕿᒃᓱᐃᖃᑎᒌᒡᖢᑎᒃ ᑖᒃᑯᑎᒍᑦ ᐃᓄᐃᓪᓗ ᑲᓇᑕᒥ ᒐᕙᒪᖓᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᐱᕚᓪᓕᖅᑎᑦᑎᓂᐊᕋᒥᒃ ᐊᑐᓂ ᓯᕗᓪᓕᐅᑎᒋᐊᖃᖅᑕᑎᒃ ᑖᒃᑯᓄᖓᑦᑕᐃᓐᓇᖅ ᓯᕗᓪᓕᐅᑎᒋᐊᓕᖕᓄᑦ, ᓴᖕᖏᒃᑎᒋᐊᕐᓗᒋᑦ ᐃᓄᐃᑦ-ᑲᓇᑕᐅᑉ ᒐᕙᒪᒃᑯᖏᓪᓗ ᐱᓕᕆᖃᑎᒌᒍᑎᒋᔭᒥᖕᓂᒃ, ᐊᒻᒪᓗ ᓴᕿᑦᑎᓯᒪᓗᑎᒃ ᑮᓇᐅᔭᓕᐅᑦᑎᐊᕈᑕᐅᔪᓐᓇᕐᓗᓂ ᐃᓄᐃᑦ ᓄᓇᖓ.
ᐅᓪᓗᒥ ᑲᑎᒪᓂᖅ, ᓯᕗᓕᐅᖅᑎᑦ ᐅᖃᖃᑎᒌᓚᐅᖅᑐᑦ ᐋᕿᒃᓱᐃᓂᕐᒧᑦ ᑲᓇᑕᒥᒃ ᐱᖁᔭᕐᔪᐊᖅ ᐊᒻᒪᓗ ᖃᓄᖅ ᐊᑐᓕᖅᑎᑕᐅᔪᓐᓇᕐᓂᖏᑦ ᐊᑑᑎᖃᑦᑎᐊᖅᑐᑦ ᐊᒻᒪᓗ ᒪᓕᑦᑎᐊᖅᑐᑦ ᐃᓄᐃᑦ ᒫᓐᓇ ᐊᖏᕈᑎᖏᓐᓂᒃ ᐊᒻᒪᓗ ᐱᓕᕆᖃᑎᒌᒍᑎᖏᓐᓂᒃ ᐃᓄᐃᓪᓗ.
ᑕᐃᒪᓐᓇᐅᓂᖓᓄᑦ ᑖᔅᓱᒧᖓ ᐋᕿᒃᓱᐃᓂᕐᒧᑦ ᑲᓇᑕᒥᒃ ᐱᖁᕐᔪᐊᖅ, ᒐᕙᒪᑐᖃᒃᑯᑦ ᐊᒻᒪᓗ ᐃᓄᐃᑦ ᓯᕗᓕᐅᖅᑎᑦ ᐅᖃᖃᑎᒌᓚᐅᖅᑐᑦ ᓇᑉᐸᕆᐊᖃᖅᑐᓂᒃ ᐃᒡᓗᓕᐅᕆᐊᖃᖅᑐᓪᓗ ᑭᓐᖒᒪᒋᔭᐅᔪᓂᒃ ᐃᓄᐃᑦ ᓄᓇᖓᓂ, ᑲᓇᑕᐅᑉ ᐅᑭᐅᖅᑕᖅᑐᖏᑦ ᑲᓇᑕᐅᓪᓗ ᐊᑭᐊᓄᑦ ᐊᑐᐊᒐᖅ, ᐊᒻᒪᓗ ᐱᑕᖃᕆᐊᖃᖅᑐᖅ ᓴᐳᒻᒥᒃᑲᓐᓂᕈᑎᒃᓴᓂᒃ ᐅᓗᕆᐊᓇᖅᑐᒦᑦᑐᖃᓕᖁᓇᒍ ᐅᐊᑦᓯᔨᓂᒃ ᐊᒻᒪᓗ ᓄᓇᖁᑎᑐᖃᖓᓂᒃ ᐅᑭᐅᖅᑕᖅᑐᖅ ᐊᒻᒪᓗ ᐃᓄᐃᑦ ᓄᓇᖓ. ᐅᑯᐊᑦᑕᐅᖅ ᐅᖃᐅᓯᐅᒋᐊᓕᑦ ᐊᓯᖏᑦ ᑐᐊᕕᕐᓇᖅᑐᑦ ᓯᕗᓪᓕᐅᑎᒋᐊᓕᑦ ᓴᕿᑕᐅᓯᒪᔪᑦ ᐱᕕᖃᕐᑎᑦᑎᓕᖅᓯᒪᔪᑦ ᐋᕿᒃᓱᐃᖃᑎᒌᒍᓐᓇᕐᓗᑕ ᐱᓕᕆᐊᕆᓗᒋᑦ ᑖᒃᑯᐊ ᐱᔭᕐᓂᓐᖏᑦᑐᑦ ᐊᒻᒪᓗ ᑐᓂᓯᓯᒪᓗᑕ ᑐᑭᖃᑦᑎᐊᖅᑐᓂᒃ ᒪᑭᒪᓇᓱᐊᕈᑎᒃᓴᓄᑦ ᑮᓇᐅᔭᖃᑦᑎᐊᕈᑎᒃᓴᓂᒃ.
ᐃᓅᕕᖕᒥ, ᑲᓇᑕᐅᑉ ᓯᕗᓕᐅᖅᑎᒻᒪᕆᖓ ᑐᓴᖅᑎᑦᑎᓚᐅᖅᑐᖅ ᑎᒃᑯᐊᖅᑕᐅᔪᖅ ᕗᔾᔨᓂᐊ ᒨᓐᔅ ᑲᓇᑕᐅᑉ ᐅᑭᐅᖅᑕᖅᑐᒧᑦ ᑭᒡᒐᖅᑐᖅᑎᒻᒪᕆᖓ, ᐱᒋᐊᕐᓗᓂ ᓯᑎᐱᕆ 15, 2025. ᐅᓇ ᑭᒡᒐᖅᑐᖅᑎᒻᒪᕆᖓᑦ ᑎᓕᔭᐅᔪᖅ ᐊᐅᓪᓗᑎᓗᒋᑦ ᐊᑐᖅᑕᐅᒃᑲᓐᓂᕆᐊᓕᑦ ᐱᒋᐊᓪᓚᒃᑲᓐᓂᕆᐊᓕᑦ ᑲᓇᑕᐅᑉ ᐅᑭᐅᖅᑕᖅᑐᓂ ᑲᑎᒪᖃᑦᑕᕐᓂᖏᑦ ᐃᓱᒪᖃᑎᒥᖕᓂᒃ ᐱᓕᕆᖃᑎᒥᖕᓂᒃ ᐊᒻᒪᓗ ᐊᒥᓱᒃᑲᓐᓂᕐᓂᒃ ᓄᓇᖃᑎᒋᓐᖏᑕᓂᒃ ᑲᑎᒪᖃᑎᖃᕐᓂᖅ, ᐃᑲᔪᖅᓱᒃᑲᓐᓂᕆᐊᕈᑎ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᓂᖓᓄᑦ, ᐊᒻᒪᓗ ᐱᐅᓯᒋᐊᒻᒪᕆᒃᓗᑎᒃ ᐱᕕᖃᖅᑎᑦᑎᓂᖅ ᐊᑦᑕᕐᓇᖅᑐᒦᑕᐃᓕᑎᑦᑎᓂᕐᒧᑦ ᐅᐊᑦᓯᔨᑦ ᐊᒻᒪᓗ ᐱᕈᖅᐸᓪᓕᐊᔭᕆᐊᓕᑦ ᐱᕈᖅᐸᓪᓕᐊᑎᓪᓗᒋᑦ.
ᐃᓄᐃᑦ ᓯᕗᓕᐅᖅᑎᑦ ᐊᒻᒪᓗ ᒐᕙᒪᑐᖃᒃᑯᑦ ᓴᖕᖏᒃᑎᒋᐊᖅᐸᖏᑦ ᐊᑐᖅᑕᐃᓐᓇᕆᒐᒥᔾᔪᒃ ᓴᓇᖃᑎᒌᖕᓂᐊᕐᓗᑎᒃ ᓯᕗᓪᓕᐅᑎᒋᐊᓕᖕᓄᑦ ᑖᒃᑯᑎᒍᑦ ᐃᓄᐃᓪᓗ ᑲᓇᑕᒥ ᒐᕙᒪᖓᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ.
ᐅᖃᖅᑕᐅᔪᑦ
“ᐅᓪᓗᒥ ᐃᓄᐃᓪᓗ ᑲᓇᑕᒥ ᒐᕙᒪᖓᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᑲᑎᒪᔪᑦ ᐱᔾᔪᑎᒋᓪᓗᒍ ᐋᕿᒃᓱᕐᓂᐊᕐᒪᑕ ᓯᕗᓂᒃᓴᑦᑎᓐᓄᑦ ᐊᒻᒪᓗ ᐃᓄᐃᑦ ᓄᓇᖓ ᑕᒪᐃᓐᓂᒃ ᑮᓇᐅᔭᓕᐅᕈᑎᖃᕐᑎᑦᑎᔪᓐᓇᖅᑐᖅ. ᐱᓕᕆᖃᑎᒋᓗᒋᑦ, ᐃᓄᐃᑦ ᐊᒻᒪᓗ ᒐᕙᒪᑐᖃᒃᑯᑦ ᐋᕿᒃᓱᐃᓂᐊᕋᑦᑕ ᐊᖏᔪᓂᒃ ᓴᓇᔭᒃᓴᓂᒃ ᐅᑯᐊ ᑲᑎᖓᓕᖅᑎᑦᑎᓂᐊᖅᑐᑦ ᐊᒻᒪᓗ ᐋᕿᑦᑎᐊᕐᓗᒋᑦ ᒪᑭᒪᓇᓱᐊᕈᑎᕗᑦ, ᓴᕿᑦᑎᓗᑕ ᑮᓇᐅᔭᓕᐅᑦᑎᐊᕈᑎᒃᓴᓂᒃ ᐊᒻᒪᓗ ᐱᕕᖃᕐᑎᑦᑎᓂᕐᒥᒃ, ᐊᒻᒪᓗ ᐋᕿᒃᓱᐃᓗᑕ ᓴᖕᖏᓂᖅᓴᐅᓕᕐᓂᐊᕐᒪᑦ ᑲᓇᑕ.”
ᒫᒃ ᑳᓂ, ᑲᓇᑕᐅᑉ ᓯᕗᓕᐅᖅᑎᕐᔪᐊᖓ
“ᒫᓐᓇ 9-ᖑᕗᑦ ᐊᕐᕌᒍᑦ, ᐅᑯᐊ ᐃᓄᐃᓪᓗ ᑲᓇᑕᒥ ᒐᕙᒪᖓᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᓱᓕ ᐱᒻᒪᕆᐅᔪᒥᒃ ᓴᓇᕐᕈᑎᑦ ᐱᕚᓪᓕᕐᑎᑦᑎᓂᐊᕐᓗᓂ ᑕᒪᐃᓐᓂᑦ ᐊᑐᖅᑕᐅᔪᓄᑦ ᓯᕗᓪᓕᐅᑎᒋᐊᓕᖕᓄᑦ. ᐅᓇ ᐃᓚᖃᖅᑐᖅ ᐅᓄᖅᓯᒋᐊᕐᓗᒋᑦ ᖃᑭᔾᔪᑎᒃᓴᑦ ᐃᓄᐃᑦ ᓄᓇᖓᓂ ᑕᒪᐅᓐᓇ ᐊᑐᓕᖅᑕᐅᑎᑦᑎᓗᑕ ᐋᕿᒃᓱᐃᓂᕐᒧᑦ ᑲᓇᑕᒥᒃ ᐱᖁᔭᕐᔪᐊᖅ ᑕᐃᒫᒃ ᒪᓕᑦᑎᐊᕐᓗᓂ ᐃᓄᐃᑦ ᐊᖏᕈᑎᖏᓐᓂᒃ ᐊᒻᒪᓗ ᐱᓕᕆᖃᑎᒌᒍᑎᒥᖕᓄᑦ ᐃᓄᖕᓄᑦ. ᑐᓐᖓᓱᒃᑎᑦᑎᕗᒍᑦ ᐱᕕᖃᕐᑎᑦᑎᔪᓐᓇᕐᓂᕐᒥᒃ ᑲᔪᓯᓂᐊᕐᒪᑦ ᐅᓇ ᐱᒻᒪᕆᐅᔪᖅ ᐱᓕᕆᐊᕆᔭᖓ ᒫᒃ ᑳᓂ, ᓴᖕᖏᒃᑎᒋᐊᕐᓗᒋᑦ ᐱᓕᕆᖃᑎᒌᒍᑎᒋᔭᕗᑦ ᐊᒻᒪᓗ ᐋᕿᒃᓱᕐᓗᒋᑦ ᐊᑯᓂᐅᔪᒥᒃ ᑮᓇᐅᔭᓕᐅᕈᑎᖃᕐᑎᑦᑎᓂᐊᕐᒪᑕ ᐃᓄᖕᓄᑦ ᐃᓄᐃᑦ ᓄᓇᖓ ᐊᒻᒪᓗ ᑕᒪᐃᓐᓂ ᑲᓇᑕᒥᒃ. ᖁᕕᐊᓇᖅᐳᖅ ᐅᓪᓗᒥ ᑐᓴᕐᑎᑦᑎᓪᓗᑕ ᕗᔨᓂᐊ ᒨᓐᔅ ᐅᓇ ᑲᓇᑕᐅᑉ ᐅᑭᐅᖅᑕᖅᑐᒧᑦ ᑭᒡᒐᖅᑐᖅᑎᒻᒪᕆᖓ, ᐃᖅᑲᓇᐃᔮᖓ ᓴᕿᑕᐅᔪᖅ ᑖᒃᑯᑎᒍᑦ ᐃᓄᐃᓪᓗ ᑲᓇᑕᒥ ᒐᕙᒪᖓᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ.”
ᓇᐃᑕᓐ ᐅᐱᑦ, ᐊᖓᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ
“ᐋᕿᒃᓱᐃᓂᐊᕐᓗᑕ ᓴᖕᖏᓂᖅᓴᒥᒃ, ᖃᓄᐃᖏᑦᑎᐊᖁᓪᓗᒋᑦ ᓄᓇᓖᑦ ᐊᒻᒪᓗ ᑮᓇᐅᔭᓕᐅᑦᑎᐊᕐᓗᑎᒃ, ᓴᓇᖃᑎᒌᒋᐊᖃᖅᑐᒍᑦ. ᑕᒪᓐᓇ ᐱᔾᔪᑎᒋᓪᓗᒍ, ᐱᓕᕆᐊᒃᓴᐃᑦ ᓅᑉᐸᓪᓕᐊᔭᕆᐊᓕᑦ ᓯᕗᒻᒧᑦ ᐃᓄᐃᑦ ᓄᓇᖓᓂ ᑕᐃᒪᓐᓇᐅᓂᐊᖅᑐᑦ ᐱᓕᕆᖃᑎᒋᓗᒋᑦ ᐃᓄᐃᑦ. ᐊᖏᖅᓯᒪᕗᒍᑦ ᑲᑎᒪᖃᑦᑕᕐᓗᑕ, ᓈᓚᖃᑦᑕᕐᓗᑕ, ᐊᒻᒪᓗ ᓴᓇᖃᑎᒋᓗᒋᑦ ᓄᓇᓖᑦ ᐊᒻᒪᓗ ᐃᓄᐃᑦ ᓯᕗᓕᐅᖅᑎᑦ ᑕᐃᒫᒃ ᓯᕗᓪᓕᐅᑎᖁᔭᖏᑦ ᐊᒻᒪᓗ ᑕᐅᑦᑐᖏᑦ ᐊᑐᖅᑕᐅᑦᑎᐊᕐᓂᐊᕐᒪᑕ ᓴᓇᓂᐊᖅᑕᑦᑎᓐᓄᑦ ᓯᕗᓂᒃᓴᑦᑎᓐᓄᑦ. ᐅᓪᓗᒥ ᑲᑎᒪᓂᖅ ᐱᒻᒪᕆᐅᔪᖅ ᐱᒋᐊᕈᑎᒋᓪᓗᒍ ᐋᕿᒃᓱᐃᓂᕐᒧᑦ ᑲᓇᑕᒥᒃ ᐱᖁᔭᕐᔪᐊᖅ ᐃᑲᔪᖅᑐᖅ ᓯᕗᓂᒃᓴᖃᑦᑎᐊᕐᓂᐊᕐᒪᑕ ᐃᓄᐃᑦ ᑕᒪᐃᓐᓂ ᐃᓄᐃᑦ ᓄᓇᖓᓂ.”
ᐅᓖᐱᑲ ᐋᓪᑎ, ᒥᓂᔅᑕᖓᑦ ᐃᓄᓕᕆᔨᑐᖃᒃᑯᑦ ᑲᓇᑕ
“ᑲᓇᑕ ᐋᕿᒃᓱᐃᓂᐊᖅᑐᖅ ᐊᖏᔪᓄᑦ ᓴᓇᔭᒃᓴᓂᒃ ᐱᓕᕆᖃᑎᒌᑦᑎᐊᕐᓗᒋᑦ ᐃᓄᐃᑦ, ᐊᒻᒪᓗ ᑐᑭᒧᐊᒃᑎᑕᐅᓂᐊᕋᑦᑕ ᓂᖏᐅᑎᑦᑎᒍᑦ, ᐃᓚᐅᑎᑕᐅᓂᒃᑯᑦ, ᐊᒻᒪᓗ ᐊᑐᖅᑐᐃᓐᓇᐅᓗᑕ ᖃᑭᔾᔪᑎᓂᒃ ᑮᓇᐅᔭᓕᐅᕈᑎᓂᒃ. ᑕᒪᐅᓐᓇ ᑐᑭᓯᓇᓱᖃᑎᒌᖃᑦᑕᕐᓂᒃᑯᑦ ᐊᒻᒪᓗ ᐃᑲᔪᖅᑎᒌᖕᓂᒃᑯᑦ, ᐃᓄᐃᑦ ᓂᐱᖏᑦ ᐋᕿᒃᓱᐃᔾᔪᑎᒋᓗᒋᑦ ᓯᕗᓂᒃᓴᑦᑎᓐᓂ ᓇᑉᐸᕆᐊᖃᖅᑐᑦ ᐃᒡᓗᕐᔪᐊᑦ, ᓄᓇᖁᑎᕗᑦ, ᐊᒻᒪᓗ ᒪᑭᒪᓇᓱᐊᕈᑎᒃᓴᑦ ᐱᕕᖃᕐᑎᑦᑎᓂᖅ ᑕᒪᐃᓐᓂ ᐃᓄᐃᑦ ᓄᓇᖓᓂ.”
ᐅᓖᐱᑲ ᓵᑐᓛᓐᑦ, ᒥᓂᔅᑕ ᐅᑭᐅᖅᑕᖅᑐᒥ ᐱᓕᕆᐊᖑᔪᓄᑦ ᑲᓇᑕ ᐊᒻᒪᓗ ᒥᓂᔅᑕ ᐱᔭᒃᓴᖃᖅᑐᖅ ᑲᓇᑕᐅᑉ ᐅᑭᐅᖅᑕᖅᑐᐊᓂ ᒪᑭᒪᓇᓱᐊᕐᓂᕐᒧᑦ ᐱᕙᓪᓕᐊᑎᑦᑎᓂᖅ ᑎᒥᖁᑖ
“ᑲᓇᑕ ᐅᓇ ᐅᑭᐅᖅᑕᖅᑐᐊ, ᐊᒻᒪᓗ ᐊᒃᓱᕈᓐᓇᖅᑐᒦᓕᕋᑦᑕ ᒫᓐᓇᐅᔪᖅ, ᑕᐃᑲᓂ ᐱᒻᒪᕆᐅᔪᖅ ᐅᑯᐊ ᐊᑦᑕᕐᓇᖅᑐᒦᓕᖅᑕᐃᓕᑎᓪᓗᒋᑦ ᓄᓇᖁᑎᕗᑦ ᐊᒻᒪᓗ ᓴᐳᒻᒥᓗᒋᑦ ᐅᑭᐅᖅᑕᖅᑐᖅ ᐱᔪᒪᔭᖏᑦ. ᐱᔨᑦᑎᕋᖅᖢᖓ ᑲᓇᑕᐅᑉ ᐊᖓᔪᖅᑳᖓ ᐅᑭᐅᖅᑕᖅᑐᒧᑦ, ᐅᓇ ᑭᒡᒐᖅᑐᖅᑎᒻᒪᕆᒃ ᒨᓐᔅ ᐱᕚᓪᓕᕐᑎᑦᑎᓂᐊᖅᑐᖅ ᑲᓇᑕᐅᑉ ᐅᑭᐅᖅᑕᖅᑐᐊᓂ ᐱᔭᐅᔪᒪᔪᓂᒃ ᑕᒪᐃᓐᓂᑦ ᓇᑭᑐᐃᓐᓇᖅ ᑲᑎᒪᑎᑦᑎᖃᑦᑕᕐᓗᑎᒃ, ᑲᑎᒪᖃᑎᒋᕙᒡᓗᒋᑦ ᐅᑭᐅᖅᑕᖅᑐᒥᐅᖃᑎᖏᑦ ᐊᒻᒪᓗ ᐅᑭᐅᖅᑕᖅᑐᒦᓐᖏᑦᑐᑦ ᓄᓇᐃᑦ, ᐊᒻᒪᓗ ᐱᔨᑦᑎᕋᕐᓗᓂ ᑭᒡᒐᖅᑐᖅᑎᐅᓗᓂ ᒐᕙᒪᓕᕆᓂᕐᒧᑦ ᐃᑲᔪᖅᑎᖏᓐᓄᑦ.”
ᐊᓃᑕ ᐊᓐᓇᓐᑦ, ᒥᓂᔅᑕᖓ ᑲᓇᑕᐅᑉ ᐊᑭᐊᓄᑦ
ᓱᓕᔪᑦ
- ᐃᓄᐃᑦ ᓄᓇᖓᑦ ᐅᓇ ᐃᓄᐃᑦ ᓄᓇᖓ ᑲᓇᑕᒥ. ᑕᒪᕐᒥᒃ ᓄᓇ, ᐃᒪᖅ, ᐊᒻᒪᓗ ᓯᑯ ᑎᓴᒪᑦ ᐊᖏᕈᑎᑦ ᐊᑐᖅᑕᐅᔪᑦ ᐊᕕᒃᑐᖅᓯᒪᔪᓂ ᑭᒡᒐᖅᑐᖅᑕᐅᔪᑦ ᑖᒃᑯᓇᖓᑦ ᐃᓅᕕᐊᓗᒃ ᓄᓇᑦᓯᐊᕐᒥ, ᓄᓇᕗᑦ, ᓄᓇᕕᒃ ᑯᐸᐃᒃ ᑕᕐᕋᖓᓂ, ᐊᒻᒪᓗ ᓄᓇᑦᓯᐊᕗᑦ ᐅᐊᖕᓇᖓ ᓛᐸᑐᐊᒥ.
- ᐅᓇ ᐋᕿᒃᓱᐃᓂᕐᒧᑦ ᑲᓇᑕᒥᒃ ᐱᖁᕐᔪᐊᖅ ᑎᑎᕋᖅᓯᒪᔪᖃᖅᑐᖅ ᑐᑭᓯᓇᓱᖃᑎᖃᖅᐸᒃᓗᑎᒃ ᐃᓄᖕᓂᒃ ᐊᒻᒪᓗ ᐊᓯᖏᓐᓂᒃ ᓄᓇᖅᑲᖅᑳᖅᓯᒪᔪᓂᒃ ᐋᕿᒃᓱᐃᖃᑎᒋᓗᒋᑦ ᐊᑐᓕᖅᑎᑕᐅᕙᓪᓕᐊᔪᑦ ᐱᕙᓪᓕᐊᔭᐅᓂᖏᑦᑎᒍᑦ ᖃᐅᔨᑦᑎᐊᕐᓂᐊᕐᒪᑕ ᖃᓄᖅ ᐱᓕᕆᐊᖑᔪᖅ ᑲᓇᑕᒧᑦ ᐱᓕᕆᔭᐅᔪᒪᒐᔭᕐᒪᖔᑦ ᐊᒻᒪᓗ ᐋᕿᒃᓱᐃᓗᑎᒃ ᒪᓕᒃᑕᐅᒋᐊᖃᖅᑐᓂᒃ ᐱᔪᓐᓇᐅᑎᑦᑎᒍᑦ ᐊᒻᒪᓗ ᐊᖕᖏᖅᓯᖃᑦᑕᕆᐊᖃᕐᓂᒃᑯᑦ.
- ᐅᓇ ᐋᕿᒃᓱᐃᓂᖅ ᑲᓇᑕᒥᒃ ᐱᖁᕐᔪᐊᖅ ᐃᒃᐱᒍᓱᑦᑎᐊᖅᑎᑦᑎᔪᖅ ᐊᖏᕈᑎᖏᓐᓂᒃ ᐱᔪᓐᓇᐅᑎᖃᖅᑐᑦ, ᐃᓚᒋᔭᐅᓪᓗᑎᒃ ᒫᓐᓇ ᐊᖏᕈᑎᑦ ᐃᓄᖕᓄᑦ ᐊᖏᕈᑎᑖᖅᓯᒪᔪᑦ ᐊᐅᓚᑦᓯᔨᑦ. ᐊᓯᖑᐃᓂᐊᓐᖏᑦᑐᑦ ᐱᓕᕆᔾᔪᓯᑦ ᐋᕿᒃᑕᐅᓯᒪᔪᑦ ᒫᓐᓇ ᐊᖏᕈᑎᑦᑎᒍᑦ ᐅᕝᕙᓘᓐᓃᑦ ᑲᓇᑕᐅᑉ ᒐᕙᒪᒃᑯᖏᑦ ᒫᓐᓇ ᐊᖏᕈᑎᑦᑎᒍᑦ ᐊᑐᕆᐊᖃᖅᑕᖏᑦ. ᐃᒃᐱᒍᓱᑦᑎᐊᕐᓗᑎᒃᑕᐅᖅ ᐊᖏᕈᑎᓂᖔᖅᓯᒪᔪᑦ ᐊᕙᑎᑦᑎᓂᒃ ᖃᐅᔨᓴᕈᓯᑦ.
- ᐅᓇ ᓄᑖᖅ ᑲᓇᑕᐅᑉ ᐅᑭᐅᖅᑕᖅᑐᐊᓄᑦ ᑭᒡᒐᖅᑐᖅᑎᒻᒪᕆᒃ, ᕗᔨᓂᐊ ᒨᓐᔅ, ᐃᒃᐱᒋᔭᐅᑦᑎᐊᖅᑐᖅ ᐃᓄᖕᓂᑦ ᓯᕗᓕᐅᖅᑎ ᐊᑯᓂ ᐊᖏᖅᓯᒪᔭᖃᖅᑐᖅ ᐱᕚᓪᓕᖅᑎᑦᑎᕙᓪᓕᐊᓂᕐᒥᒃ ᐃᓄᐃᑦ ᓇᖕᒥᓂᖅ-ᒐᕙᒪᖃᕐᓗᑎᒃ ᐊᒻᒪᓗ ᓄᓇᓕᖕᓂ ᖃᓄᐃᖏᑦᑎᐊᕆᐊᖃᕐᓂᖅ ᓄᓇᕗᒻᒥ. ᐅᓇ ᒫᓐᓇ ᐊᖓᔪᖅᑳᖑᔪᖅ ᑐᑭᒧᐊᒃᑎᖓ ᐃᓄᖕᓄᑦ ᐱᓇᓱᐊᖅᑎ ᑕᐃᑲᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᒻᒪᓗ ᐊᖓᔪᖅᑳᖑᖃᑦᑕᖅᓯᒪᔪᖅ ᓄᓇᕗᑦ ᒐᕙᒪᒃᑯᓂ ᐊᒻᒪᓗ ᓄᓇᕗᑦ ᑐᓐᖓᕕᒃ ᑎᒥᖓ. ᐅᓇ ᐱᓇᓱᐊᑦᑎᐊᖅᑐᖅ ᓄᓇᒥᓂ, ᖃᑭᖁᐊᖅᑕᐅᓯᒪᔪᖅ ᑭᖕ ᓵᓪᔅ lll ᐱᓇᓱᑦᑎᐊᓲᖑᓂᖓᓄᑦ ᖃᑭᖁᐊᒥᒃ ᐊᖏᔪᒥᒃ ᐃᑲᔪᖅᓯᓯᒪᖕᒪᑦ.
- ᑕᐃᒪᖓᓂᑦ ᐊᑎᓕᐅᖅᑕᐅᓚᐅᖅᑎᓪᓗᒍ ᐃᓄᐃᑦ ᓄᓇᖓᑦ ᓱᓕᓂᕋᐅᑎ ᑕᐃᑲᓂ 2017, ᐃᓄᐃᑦ ᓯᕗᓕᐅᖅᑎᖏᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑦ ᑲᔪᓯᕗᑦ ᓴᓇᖃᑎᒌᒍᑎᒋᔭᖏᑦ ᑲᑐᑎᓪᓗᒋᑦ ᑖᒃᑯᑎᒍᑦ ᐃᓄᐃᓪᓗ ᑲᓇᑕᒥ ᒐᕙᒪᖓᓪᓗ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᑦ ᓄᑖᖑᖅᑎᑉᐸᓪᓕᐊᓗᒋᑦ ᐃᓄᐃᑦ-ᑲᓇᑕᐅᑉ ᒐᕙᒪᒃᑯᖏᑦ ᐃᓚᒌᒍᓯᖏᑦ ᒪᓕᒃᓗᑎᒃ ᐃᓕᓴᖅᓯᓂᖅ ᐱᔪᓐᓇᐅᑎᓂᒃ, ᐃᒃᐱᒍᓱᑦᑎᐊᕐᓂᖅ, ᐊᒻᒪᓗ ᐃᑲᔪᖅᑎᒌᖕᓂᖅ.
- ᐅᓇ ᐃᓄᐃᑦ ᓄᓇᖓᑦ ᐊᑐᐊᒐᖅ ᐊᑐᖅᑕᐅᒋᐊᖃᖅᑎᑦᑎᔪᖅ ᐃᓄᐃᑦ ᓇᖕᒥᓂ-ᒐᕙᒪᖃᕐᓂᕐᒧᑦ ᐊᒻᒪᓗ ᐃᑲᔪᖅᑐᖅ ᓄᓇᓕᖕᓂᒃ ᐊᒻᒪᓗ ᐃᓄᑐᐃᓐᓇᓂᒃ ᖃᓄᐃᖏᑦᑎᐊᖁᓪᓗᒋᑦ ᐃᓄᐃᑦ ᓄᓇᖓᓂ, ᑐᕌᒐᖃᖅᑐᑦ ᑎᑭᐅᑎᓗᒋᑦ ᐃᓅᓯᓕᕆᓂᕐᒧᑦ-ᒪᑭᒪᓇᓱᐊᕐᓂᕐᒧᑦ ᐊᔾᔨᒌᒥᒃ ᓂᖏᐅᑎᑦ ᐊᕙᑖᓂᑦ ᐃᓄᐃᑦ ᐊᒻᒪᓗ ᐊᓯᖏᑦ ᓄᓇᖃᖅᑐᑦ ᑲᓇᑕᒥ. ᑐᓂᓯᓯᒪᓂᐊᖅᑐᑦ ᐱᐅᓯᕐᒥᒃ ᓂᕆᐅᒋᔭᐅᓗᓂ ᐃᓚᒌᒍᓯᕐᒥᑦ ᐊᕙᑖᓂᑦ ᐃᓄᐃᑦ ᐊᒻᒪᓗ ᑕᒪᕐᒥᒃ ᒐᕙᒪᑐᖃᒃᑯᑦ ᐊᐅᓚᑦᓯᕕᖏᑦ ᐊᒻᒪᓗ ᑎᒥᖁᑎᖏᑦ, ᐊᒻᒪᓗ ᐃᓚᖃᖅᑐᖅ ᑐᑭᒧᐊᒍᑎᑦ ᒐᕙᒪᑐᖃᒃᑯᓄᑦ ᐊᒻᒪᓗ ᑎᒥᖁᑎᖏᓐᓄᑦ ᖃᓄᖅ ᑐᓂᓯᓯᒪᔪᓐᓇᕐᓂᖏᑦ ᐱᓕᕆᑎᑦᑎᔾᔪᑕᐅᔪᓂᒃ, ᐊᑐᐊᒐᕐᓂᒃ, ᐊᒻᒪᓗ ᐱᔨᑦᑎᕋᐅᑎᓂᒃ ᐃᓄᐃᑦ ᓄᓇᖓᓐᓂ.