“Maamiinochigewin da-izhichigem endaso-giizhig gii-bimaadiziying gaye ji-doodamang. Owe Debwewin gaye Maamiinochigewin omaa Gaanada Akiing gaye Misko-babagiwayaanigiizhigak gi-mikwenimaanaanig gaa-gii-zhaabwiiwaad gaye abinoojiiyag gaa-gii-bigiiwesigwaa gaye dash gi-naanaagadawendaamin gaa-gii-izhi-gichi-maanzhisewaad gaaye noongom gaa-izhi-maanzhibijigemagakin gete-gikino’amaadiiwigamigoon.
Debwewin o-gii-bimiwidoonaawaa gete-gikino’amawaaganag gaa-gii-zhaabwiiwaad gichi-ogimaawiwin dash wiin gaawiin. Debwewin 6,600 dasing gii-izhisemagan jibwaa-iziseg iwe Debwewin gaye Maamiinochigewin gaawiin dash ji-ikidod Gichi-ogimaa gaawiin nin-gii-gikendaziin. Awashime 150,000 anishinaabensag gaye Eshkiimensag gaye Aabitawizhaanensag gii-onji-odaapinaawag endaawaad ji-naganaawaad odinawemaaganiwaa dazhiikewiniwaa odinwewiniwaa gaye odizhitwaawiniwaa.
Ogimaawining onji gaye giinawind gii-bimaadiziying gi-daa-mikwenimaanaanig ogowe gaye ji-izhichigeying gegoon.
Gichi-ogimaawining nindoonji-anokaadaamin ji-doodamang gaa-izhiseng imaa mazina’iganing Debwewin gaye Maamiinochigewin gaa-gii-ikidoomagak ji-izhichigenaaniwang. Gaye ji-wiiji’indwaaanishinaabeg ji-mikawaawaad ini abinoojiiya gaa-gii-ningo’ondwaa gii-ishkwaa-bimaadiziwaad gaawiin gikendaagosinoon aaniindi etegin ini wiiyawan imaa jiigiya’ii gete-gikino’amaadiiwigamigoon gaa-izhi-badakidegin gaye noongom giiyaabi gaa-badakidegin. Nimbizindawaanaanig igi Anishinaabekwewag aye ikwezensag gaa-gii-nisindwaa gaye giiyaabi gaa-wanisewaad gaa-izhi-andooshkamowaad gaye ji-aabajichigaadeg iwe ozhibii’igan.
Nindoozhitoomin maamaw ji-wiiji’angidwaa Anishinaabeg ji-debinamowaad – mino’ayaawin waakaa’iganan gikino’amaagoowin gaye ji-gashkitoowaad ji-zhooniyaakewaad – ji-gashkitoowaad ji-dibenindizowaad ji-mino-bimaadiziwaad. Gaanada Aki noongom oshki-ayaag niigaaniiwag ji-wiidanokiimaawaad Anishinaabe ji-gashkitoowaad ji-dibenindizowaad naasaab ji-inendaagoziwaad gaye gewiinawaa ji-dibendamowaad ozhichigewin gaye ji-nisidawinamowaad wiiji’iwewining gaa-daswewaanagiziwaad ji-nisidotamowaad gakinagegoon gaye gii-ozhichigaadeg Gaanada Aki ezhi-niizhwewaanagiziwaad Anishinaabeg gaye gaa-anishinaabewisigwaa da-niigaaniiwag ji-bamitoowad owe aki.
Gichi-inendaagwan ji-ozhitooying gidakiimiaan gaye dash gewiinawaa ji-niigaaniiwaad Anishinaabeg ji-gashkichigewaad gaye ayaawad imaa. Gwayakosijigewin da-anokaade endaso-giizhig gii-bimaadiziying.
Gidikidomin ji-ozhitooying ge-izhiseg ani-aniikwang ge-izhi-gichi-inenimindwaa gaa-gii-zhaabwiiwaad ji-gwaykoseg gegoon gaye ji-onji-zoongak Gaanada Aki.”
Giiyaabi wii-gikendaman: 24 daso-diba’igan baakisin owe giigidowin 1-866-925-4419 Ge-izhi-giimooji-giigidoyan, ji-wiiji-indwaa gaa-gii-zhaabwiiwaad gikino’amawaaganag gaye odinawemaaganiwaa gaye ji-wiindamaagemagak aaniin ge-izhi-wiiji’indwaa Gaanada Aki onji. The Hope for Wellness Help Line gaye wiiji’iwemagan gaawiin memwaach ji-diba’igeng ji-gaganoonad awiya giishpin maanendaman gakina Anishinaabeg omaa Gaanada Akiing ji-wiijiindwaa. Gaa-izhi-niizhingin giigidowinan 24/7 aaniinigo apii baakisinoon zhaaganaashiimong gaye baakwaa’ishiimong. Gaye bizaanigo gaa-omashkiigoomowaad gaa-anishinaabemowaa gaye gaa-eshkiimemowaad da-ganoonaawag. Bizaanigo gaganoonaawag awiyan ayaawag imaa 1-855-242-3310 gemaa espoirpourlemieuxetre.ca.